早前輕輕咁提過吓清朝欽差大臣林則除同廣東水師提督關天培，佢哋曾經喺廣東虎門佈置海防同訓練水師，用嚟震懾外國軍隊，等對方唔敢再運鴉片嚟賣同入侵中國。咁究竟佢哋係點樣訓練水師嘅呢？軍演又喺點樣？

自1835年以嚟，廣東水師每年嘅春秋兩季都會喺虎門水域舉行海防實彈軍演。不過喺之前，廣東水師長期都無試過實彈軍事操練，係關天培嚟廣東任水師提督之後，先設計指揮咗虎門每年嘅軍演。根據關天培喺《籌海初集》所記，廣東水師每次軍演為期10日，參演嘅士兵大概2000個，演習嘅大炮都用到400座，規模都唔細㗎。成個演習一般分兩個階段，第一階段係官員檢閱，第二階段係部隊分項演習。 第一階段主要係兩廣官員乘坐檢閱船，巡迴檢閱一圈虎門各炮台同由水師船隊組成嘅水陣。當檢閱船經過炮台前面，炮台嘅官員需著正裝帶領親兵喺碼頭跪拜行禮，而士兵就要擺出「九子三壘槍陣」。喺第二階段，登上中心檢閱台嘅官員負責檢閱分項演習嘅部隊，內容包括炮台實彈射擊同水軍演習。

虎門銷煙三個月之後，林則徐喺虎門主持咗一次大規模廣東水師實彈軍事演習，目的係想恫嚇外國鴉片走私者，所以破例允許外國船喺遠處觀看，林則徐仲向朝廷上奏，話「聲勢極為壯盛」。

圖為關天培嘅《籌海初集》軍演插畫，原圖嚟自網絡。

資料來源：金羊網